ਤਾਜਾ ਖਬਰਾਂ
'ਸਿਟੀ ਬਿਊਟੀਫੁਲ' ਦੇ ਲੋਕਾਂ ਵਿੱਚ ਮਹਿੰਗੀਆਂ ਗੱਡੀਆਂ ਦੇ ਨਾਲ-ਨਾਲ ਵੀ.ਆਈ.ਪੀ. (VIP) ਨੰਬਰਾਂ ਦਾ ਕ੍ਰੇਜ਼ ਸਿਖਰਾਂ 'ਤੇ ਪਹੁੰਚ ਗਿਆ ਹੈ। ਚੰਡੀਗੜ੍ਹ ਪ੍ਰਸ਼ਾਸਨ ਦੀ ਤਾਜ਼ਾ ਨਿਲਾਮੀ ਵਿੱਚ ਲੋਕਾਂ ਨੇ ਨੰਬਰਾਂ ਦੀ ਖ਼ਾਤਰ ਆਪਣੀਆਂ ਜੇਬਾਂ ਖੁੱਲ੍ਹ ਕੇ ਢਿੱਲੀਆਂ ਕੀਤੀਆਂ, ਜਿਸ ਨੇ ਪੁਰਾਣੇ ਸਾਰੇ ਰਿਕਾਰਡ ਮਾਤ ਪਾ ਦਿੱਤੇ ਹਨ। ਨਵੀਂ ਸੀਰੀਜ਼ CH01-DD ਦੇ '0001' ਨੰਬਰ ਨੇ ਸਭ ਨੂੰ ਹੈਰਾਨ ਕਰਦਿਆਂ 53 ਲੱਖ ਰੁਪਏ ਤੋਂ ਵੱਧ ਦੀ ਬੋਲੀ ਬਟੋਰੀ ਹੈ।
ਆਰ.ਐਲ.ਏ. ਦੇ ਇਤਿਹਾਸ ਦੀ ਸਭ ਤੋਂ ਕਮਾਈ ਵਾਲੀ ਨਿਲਾਮੀ
ਰਜਿਸਟਰਿੰਗ ਅਤੇ ਲਾਇਸੈਂਸਿੰਗ ਅਥਾਰਟੀ (RLA) ਵੱਲੋਂ 4 ਤੋਂ 6 ਮਾਰਚ ਤੱਕ ਕਰਵਾਈ ਗਈ ਇਸ ਤਿੰਨ ਦਿਨਾਂ ਈ-ਨਿਲਾਮੀ ਨੇ ਪ੍ਰਸ਼ਾਸਨ ਨੂੰ ਮਾਲਾਮਾਲ ਕਰ ਦਿੱਤਾ ਹੈ। ਇਸ ਨਿਲਾਮੀ ਦੌਰਾਨ ਕੁੱਲ 591 ਨੰਬਰਾਂ ਦੀ ਬੋਲੀ ਲਗਾਈ ਗਈ, ਜਿਸ ਤੋਂ ਸਰਕਾਰ ਨੂੰ 4,48,87,000 ਰੁਪਏ ਦਾ ਵੱਡਾ ਮਾਲੀਆ ਇਕੱਠਾ ਹੋਇਆ ਹੈ। ਆਰ.ਐਲ.ਏ. ਦੇ ਇਤਿਹਾਸ ਵਿੱਚ ਇਹ ਹੁਣ ਤੱਕ ਦੀ ਸਭ ਤੋਂ ਸਫਲ ਨਿਲਾਮੀ ਮੰਨੀ ਜਾ ਰਹੀ ਹੈ।
0001 ਅਤੇ 0003 ਨੰਬਰਾਂ ਦੀ ਰਹੀ ਚੜ੍ਹਤ
ਨਿਲਾਮੀ ਵਿੱਚ ਸਭ ਤੋਂ ਵੱਡੀ ਖਿੱਚ ਦਾ ਕੇਂਦਰ CH01-DD-0001 ਨੰਬਰ ਰਿਹਾ, ਜਿਸ ਨੂੰ ਇੱਕ ਸ਼ੌਕੀਨ ਨੇ 53.88 ਲੱਖ ਰੁਪਏ ਦੀ ਭਾਰੀ ਭਰਕਮ ਕੀਮਤ 'ਤੇ ਖਰੀਦਿਆ। ਇਸ ਤੋਂ ਬਾਅਦ CH01-DD-0003 ਨੰਬਰ ਦਾ ਨੰਬਰ ਆਇਆ, ਜੋ 32.32 ਲੱਖ ਰੁਪਏ ਵਿੱਚ ਨਿਲਾਮ ਹੋਇਆ।
ਕਿਉਂ ਵਧ ਰਿਹਾ ਹੈ ਫੈਂਸੀ ਨੰਬਰਾਂ ਦਾ ਆਕਰਸ਼ਣ?
ਸ਼ਹਿਰ ਦੇ ਨਿਵਾਸੀ ਆਪਣੀ ਸੋਸ਼ਲ ਸਟੇਟਸ ਅਤੇ ਵਾਹਨਾਂ ਦੀ ਦਿੱਖ ਨੂੰ ਖ਼ਾਸ ਬਣਾਉਣ ਲਈ ਫੈਂਸੀ ਨੰਬਰਾਂ 'ਤੇ ਲੱਖਾਂ ਰੁਪਏ ਖਰਚਣ ਤੋਂ ਗੁਰੇਜ਼ ਨਹੀਂ ਕਰਦੇ। ਹਰ ਨਵੀਂ ਸੀਰੀਜ਼ ਦੇ ਆਉਣ 'ਤੇ ਬੋਲੀ ਦੀਆਂ ਕੀਮਤਾਂ ਵਿੱਚ ਹੁੰਦਾ ਵਾਧਾ ਸਪੱਸ਼ਟ ਕਰਦਾ ਹੈ ਕਿ ਚੰਡੀਗੜ੍ਹ ਵਿੱਚ ਵੀ.ਆਈ.ਪੀ. ਨੰਬਰਾਂ ਦਾ ਮੁਕਾਬਲਾ ਆਉਣ ਵਾਲੇ ਸਮੇਂ ਵਿੱਚ ਹੋਰ ਵੀ ਦਿਲਚਸਪ ਹੋਣ ਵਾਲਾ ਹੈ।
Get all latest content delivered to your email a few times a month.
